مدونات باسل جمعة

شوفوا اليوم انا معصب من الصبح مش شايف الفضى ... ومحروق راسي على سيكارة ... من الصبح تصبحت اول شي بالبواب تاع العمارة ... لاني هربت قبل ما تصحى ام جمعة وانفش فيها ... خرمان والله على سيكارة من الصبح.

اول ما شفت البواب بقولي صباح الخير

- الله لا يصبحك بالخير ... هو بيجي منك خير انت

- ليه يا ابو جمعة دا انا والله ما عمملت اي حاجة تزعل حد.

- خلص لا تفلسف وتعمل حالك بريء ترا مش شايف الفضى ونفسي بسيجارة ... ويلا اقلب وجهك بدي اطلع على الشغل

- ماشي يا بيه

والله وصلت الشغل اول مراجع تحملتو تاني مراجع تحملتو التالت اجا واحد ثقيل دم ودب ما تحملت بتفلسف كتير ... وريحتو دخان ابن الكلب شكلو مفطر ... وشهاني الدخان

المهم ما خلتلو ستر مغطى وولعت بينا للسما وطردتو فشيت غلي ... بس المدير طلبني

- خير يا ابو جمعة مش عوايدك

- يا عمي انا بصراحة صايم ومش شايف الفضى ...

- يا ابو جمعة يعني بدك تحملنا جميلة بصيامك ... بعدين هاي مش اول مرة بتصوم شو مالك

- وربي اليوم من الصبح خرمان على سيكارة

- سيكارة ولك انت متى صرت تدخن

- ايه هو انا ما بدخن صحيح نسيت والله بس فشيت غلي

اللهم اني صائم