اليوم ام جمعة اخدت افنان بنتي الصغيرة ... ونزلوا على السوق بدها تشتريلها اوعي للعيد ... الله يرضى عليها ام جمعة بتعرف البير وغطا فقالت انها بدها تشتريلها شي يكون سعرو معقول وحلو ... يعني على قد لحافك مد رجليك ... الحمد لله لا جمعة ولا افنان ناقصهم شي .
لما رجعت ام جمعة من السوق لقيت افنان متنهنه من العياط 
- خير شو في مالك يا بابا ... شو في يا ام جمعة مالها البنت
- والله يا ابو جمعة مش عاجبيتها الاواعي اللي اشترتلها ايها وبدها ابدلها
- طيب يا مرا هيك بتكسري بخاطر البنت ... اذا في شي تاني عاجبها جيبي لو بزيادة شوي
- يا ابو جمعة البنت عجبها طقم سعرو 100 دينار
- شووووووووو 100 دينار الفصعونة
... عمرها 5 سنين ... يعني لسا ما طلعت من البيضة وبدها تشتري طقم ب100 دينار ... ولك ابوكي يوم عرسوا ما اشترا بدلة ب 100 دينار ... وهي امك شرتلك شي حلو على قدنا- بابا مهي البنت امها اشترتلها الطقم ... يعني هي احسن مني 
- لا يا بابا مش هيك ... بس ابوها معو فلوس اكتر من ابوكي
- ليش طيب معو فلوس اكتر ... انت جيب فلوس كمان واشتريلي الطقم
- هههههههه مهو لو بايدي كان عملت هيك ... بس شو بدك تعملي العين بصيرة والايد قصيرة ...
- طيب ليش انت مش زي ابوها معاك فلوس
- بعدين معاها هاي كيف بدي افهمها
... شوفي يا بابا بدي اقلك زي ما جدك كان يقلي ... المال بجر مال والقمل بجر سيبان ... وجدها اكيد معو فلوس و مورث ابوها فلوس ...- طيب و جدي انا
- جدك ورثني القملات اللي كانوا في راسو ... بس الشهادة لله .... كانو من النوعية الممتاز
ابوكي يالفلوس