القصة الأصدق

 جمانة وشيماء

خلال الايام الماضية انشغ الشارع الاردني بقضية الفتاتين قضية الفتاتين  جمانة وشيماء وبغض النظر من قصته الاصدق، الأهل أم الحكومة ام خليط بينهما، فان ما حصل من تفاعلات على الشبكة النكبوتية يوضح الرؤية المنقوصة للمرأة والفتاة العربية والفجوة الكبيرة التي يعيشها المجتمع مع واقعه.

فنحن نعتقد ان الفتاة لا يمكنها ان تهرب من بيت اهلها أو ان تتمرد على واقعها و ان تخطئ وتعيش عثراتها، كما هو الشاب. ماذا لو كانا شابان هل كنا سندافع بكل قوتنا لصالح قصة اهل الشابين؟ وهل اصلا كان اهل الشابان سيطرحون فكرة ان اولادنا مربيين ومحترمين ولا يفعلون ذلك؟

إننا نحمل الفتيات ضغوط كبيرة معتقدين اننا قد حصنا الفتاة بقطعة قماش على الرأس وجلباب او عبائة على الجسد. حتى دروس الدين البعيدة كل البعد عن واقعنا الذي نعيشه لا تساهم بتحصين الفتيات.

والواقع ان لا شيء ممكن ان يضمن لنا اولاد، بنات وصبيان، خاليين من المتاعب ومع دخولنا عالم الانترنت والستالايت علينا ان نعي ان اولادنا لا يعيشون في نفس القمقم الذي نعيشه وانهم مفتوحون على خيارات نحن لا نعتقد ولا نؤمن بأنها واردة لضيق افقنا وبعدنا عن واقعهم.

وكملخص ما علينا ان نفهمه ونستوعبه من الحادثة حتى الآن هو التالي:

1) الفتاتين تحت السن القانوني وان خروجهما حتى باردتهما مع اي شخص يحمله مسؤولية قانونية ولا يحمل الطفلتين اي مسؤولية كانت.

2) لا يعيب الفتاتين ان كانتا قد خرجتا باردتهما وعادتا بارادتها العيب بان ننظر لفعلتهما بانها جريمة وليست مجرد خطأ او تهور مراهقين.

3) قد تكون الحقيقة الشيء الأبعد عن رغباتنا ولكن علينا ان نقبلها وان لا نحاربها مهما كانت صادمة لنا.

4) اول خطوة لتحصين اولادنا تأتي بتفهم واقعهم وقربنا منهم قبل اي شيء.

5) أخطاء الأطفال لا تعني انهم (مش مربيين) هي أخطاء نحن كنا جزء من اسبابها قبل ان يكونوا هم السبب.

6) أخيرا اتمنى ان لا يصيب الفتاتين اي مكروه وان يعودا لحياتهم الطبيعية قريبا.

المزيد...

محور الشر ام محور المقاومة

 صورة تضم الرئيس بشار الاسد والرئيس الايراني نجاد والسيد حسن نصرالله

بالنسبة الي اي مشروع ديني هو مشروع لتدمير المنطقة بس ما عم بقدر افهم خوف الناس من ايران على انها مشروع شيعي .

انا بشوف ايران دخلت اللعبة كما هي كل المحاور بالمنطقة والموضوع بالنسبه الها كاي محور في المنطقة هو سياسي بحت.

الواقع الحالي للمنطقة هو اما قاتل او مقتول يعني ما في اي طرف محايد الكل في المعركة سواء شاء ام ابى. واللي حطنا في هاي المعادلة هو محور الشر الاكبر امريكا وقطر والسعودية وتركيا.

ما شفنا ايران بتدخل اي دولة وبترفع اعلام الحرية واللي دخل ليبيا ودمرها وسوريا ودمرها  ومصر والجزائر وتونس كلهم من التيارات السنية واللي هي تابعة لمحور الشر.

ايران ليست دولة ضعيفة وتطلعاتها ليس الخير الاكبر للمنطقة ولكنها على كل الاحوال ما دخلت المعمعة هاي الا لما الامور صارت خطر عليها خاصة مع شريكها الاساسي في المنطقة واللي هو النظام السوري وكان الوضع اما قاتل او مقتول فهل تعتقد انو دولة كايران بدها تسلم حالها بدون قتال او تنتظر دورها في الدبح؟

رح يسيطر محور ايران روسيا سوريا على كل من سوريا والعراق واليمن وهذا افضل سيناريو ممكن يصير لانو لو خسرت في هاي المناطق انتهت المنطقة وتم المشروع الامريكي وكل اللي شفناها من قتل ودمار لحد الان رح يكون مزحة للي رح يصير فينا.

انسب سيناريو لايقاف مشروع محور الشر التدميري انو يكون مقابله مشروع بديل وان كان هذا المشروع ليس الافضل ولا هو الطموح ولكن توازن القوى هو الشي الوحيد اللي رح يخلي كل الاطراف توقف وتعيد حساباتها وتهدي اللعب وبالتالي يعطينا فرصة نعيد حسابتنا ونرتب اوراقنا.

الملخص انتصار محور الممانعة او المقاومة في اليمن لا يشكل علينا اي خوف بل العكس هو السد المنيع اللي رح يخلي محور الشر يعيد حساباتو وما في خوف من توسع هذا المحور نحو مناطق ثانية على العكس تماما فانو محور الشر ما رح يوقف ولا بفكر يوقف قبل تدمير المنطقة.

المزيد...

يوم في المواصلات العامة

سيارات سرفيس في عمان تصطف بانتظار الركاب

بما انو رجلي مش دائما بتساعدني على المشي واليوم وضعها منيح قررت طلع مواصلات عامة والموضوع سهل مواصلة بطول شارع الاستقلال للداخلية.

وبما اني بمشي دادا فتعايشت مع الاخلاق الاردنية الجميلة في القيادة ... لانو الواحد بشوفك بتفكر تقطع بدعس باقوى ما عندو بنزين علشان ما تفكر ولو تفكير بانك تقتطع ... واذا شافوك ماشي الهوينا راحت على شبابك ممكن إذا ما دعسك ينزل من سيارتو ويدعس ب... بطنك.

المشكلة الأكبر هي انو الأرصفة في الأردن مخصصة فقط للأشجار والسيارات يعني مستحيل تقدر تمشي على الرصيف ... مثلا في بنايتنا الرصيف مكمل لكراج البيت بعد ما استولى صاحب البناية على الكراجات ليعمل فيهم حديقة للطابق الأرضي.

يمكن واحد بحالتي بمشي يدبر امورو بالمشي على الشارع بس كيف ممكن انسان عندو اعاقة يقدر يتنقل بكرسي؟ خاصة وانو الارصفة في المناطق السكنية بالذات غير مجهزة ابدا للتنقل بعرباية ولا حتى عرباية اطفال.

مع اني من سنين ما ركبت سرفيس بس ما تغيير علي شي نفس الوجوه مقفهرة وتعبانة. ركبت خلف السايق وطبعا رجلي وصلو حلقي من الوسع والراحة. برأي انو النقل بسيارة صالون على انها نقل عام اسفل وغبى اسلوب نقل عام.

الحقيقة، احنا ما عنا نقل عام احنا عنا نقل جماعي يعني مجموعة من الناس بتركب بتكسي او باص واحد لان مفهوم النقل العام بتلخص بملكية الدولة واشرافها الكامل على المواصلات العامة بس دولتنا باعت المواصلات العامة للشركات اللي احتكار يعض خطوط النقل وبتروح بتأجر الباصات للسواقين بضمانات يومية وبهيك بتلخص عنا أهم شكل للدولة الاشتراكية الاجتماعية العربية: بدل ما يكون السواق موظف او بدل ما تكون السواقة مهنة بياخد عليها السايق راتب اخر الشهر وتامين صحي وضمان اجتماعي صارت (رزقتو) بقيادة السيارات إذا عطل يوم بنقص دخل هاليوم ولو مرض ما عندو تامين ولما يكبر بالسن ضمانتو الوحيدة هي بأولادو يصرفو عليه. شي قمة بينرفع راسك فيه ... مش بقولك ارفع راسك !!!؟؟؟؟

المزيد...

إعادة تفعيل عقوبة الإعدام

حكم الإعدام

 

 

بما انه حديث الساعة وكنت انوي الحديث عنه قبل فترة إلا أنني انشغلت بالفترة الأخيرة بالعمل على تأسيس عمل خاص حتى سمعت بخبر تنفيذ حكم الإعدام بالبعض أمس الأحد الموافق 21-12-2014.

 

 قبل بضعة اسابيع كنا في حوارية عن حكم الاعدام ومدى فعاليته في تخفيف الجرائم في المجتمع واهم ما وصلت له ،على المستوى الشخصي، خلال الحوار انني حسب قوانين الاردن محكوم عدة أحكام اعدام، ذلك أنني كنت ممن طالبوا بالإصلاحات وخاصة الدستورية، إذ أن المادة 136 تعاقب بالإعدام كل من يعمل على تغيير الدستور بطرق غير مشروعة؛ أي عن طريق آخر غير مجلس الدولة. حيث أن عدد النصوص القانونية التي تفرض عقوبة الاعدام في مختلف الجرائم 28 نصا في التشريعات الاردنية منها 15 نص في قانون العقوبات,7 نصوص في قانون العقوبات العسكري,نصين في قانون المخدرات والمؤثرات العقلية,3 نصوص في قانون حماية اسرار ووثائق الدولة ونصا واحدا في قانون المفرقعات.

 

وهذا العدد من النصوص يعتبر كبير جدا ويساهم بشكل أو بآخر بتعزيز ثقافة القتل في المجتمع لا العكس ذلك ان كثرة هذه النصوص ساعدت على استسهال حل الأزمات من خلال الإعدام وأكبر دليل على ذلك الإعدامات التي تحصل في سوريا فقد أصبحت أسهل الطرق لمعاقبة المعارضين هي القتل، اعدموه لانه مرتد، اعدموه لانه معارض، اعدموه لانه مع النظام. هذا بالإضافة لأن العديد من هذه النصوص فضفاض قابل للتأويل والتلاعب و تسهيل الإعدامات السياسية، كما تم في مصر باحكام اعدام الاخوان المسلمين، وخاصة الأحكام الداخلة ضمن اختصاص محكمة أمن الدولة.

 

ولمن لا يعرف محكمة أمن الدولة الأردنية يمكن أن ألخص لها أنها محكة خاصة، ولا تدخل ضمن تشكيل المحاكم النظامية تشكل بموجب قانون محكمة أمن الدولة لسنة 1959، ويشكلها رئيس مجلس الوزراء، وتتألف من ثلاثة قضاة مدنيين أو عسكريين ينسب القضاة المدنيين وزير العدل، وينسب القضاة العسكريين رئيس هيئة الأركان المشتركة، وقد وتم تشكيلها منذ سنوات من قضاة عسكريين، وقد تم إضافة قاض مدني لهيئتها بالآونة الأخيرة، أي انها محكمة غير دستورية وكما هو واضح تماما فإنها محاكم قابلة للإستخدام بعمليات التصفية السياسية.

 

بالاضافة لما سبق فان تطبيق القانون قد لا يكون عادل فقد يسمح بالعديد من الحالات لمجرمين بالهروب من حكم الاعدام إن كان قادرا على دفع اموال الدية او اموال لتكليف محامي كبير ومن المعروف أن المحامي الجيد قادر على إيجاد الثغرات القانونية واستغلالها، فما بالكم بقوانين كقوانين الأردنية الفضفاضة؟ أي ان من يحكمون بالاعدام هم بالغالب فئتين اما المعارضين السياسيين او فقراء، ذلك أنهم غير قادرين على الدفاع عن انفسهم.

 

كما أن عقوبة الإعدام غير قابلة للتراجع عنها فإن صدر حكم الإعدام على شخص ما وثبت لاحقا أنه بريئ فلا يمكن العودة عن الحكم إن تم تنفيذه وبذلك نكون قد قتلنا نفسا بغير وجه حق، وهو ما حدث أكثر من مرة في دول غريبة،.

 

 

وبالملخص قد يكون حكم الإعدام عقوبة مناسبة لعديد من الأشخاص ممن قاموا بجرائب تستحق الإعدام إلا أن أحكام الإعدام بالقانون الأردني واسعة وتدخل فيها أحكام بالغالب يمكن ان تستخدم بالإعدامات السياسية. هذا بالإضافة لأن حكم الإعدام لا يعتبر رادعا ومخففا للجريمة ويمكن ان يكون له آثر عكسية. لذا فإنني أطالب بما يلي:

1. تقنين النصوص التي يحكم بها بالإعدام.
2. إعادة النظر بالكثير من القوانين الأردنية من خلال لجان خاصة، يمكن أن تكون ضمن وزارة العدل، للوصول لقوانين تهدف لإصلاح المجتمع وليس معاقبة الجاني كأولوية.
3. إيقاف محكمة أمن الدولة وكل المحاكم الغير دستورية والتي يمكن أن تستخدم كأداة لقمع المعارضة.

ويمكن الرجوع لهذه الروابط لمزيد من المعلومات:

 

http://ar.ammannet.net/documentary/news/2197/

https://deathkeys.wordpress.com/jordan/

 

المزيد...

هذربات: نبوء هتلر للعرب

منذ بداية الأحداث في سوريا وأنا أعيش تلك الحالة من الصراع مع الذات بين الاستمرار في المحاولة لتغيير تلك الحالة الهمجية التي تسيطر يوما بعد يوم على الواقع العربي وبين الشعور بأن الحل غير ممكن وأن الهجرة قد تكون المهرب الوحيد لنا من طوفان الدم الهادر في الوطن العربي.

إن المتتبع لأحداث ما يسمى بالربيع العربي كان يستطيع بسهولة تنبأ الحالة التي ستصل لها سوريا بعد الثورة ذلك أن مفهوم الثورة بدأ على أساس انتقامي طائفي مدعوم بشكل مباشر من دول هدفها بعيد جدا عن الحرية والديموقراطية وحلم الاسقرار. وهذا ما جعلني بالأساس اغير موقفي تجاه الثورة السورية من مؤيد لها لمناهض ومعارض.

في الأمس كشف زميل سابق  لي عن قناعه وقد كنت احتملت ثقالة دم تعليقاته واصراره على استفزازي لفترة طويلة من خلال القاء تسميات على كالشيوعي والليبرالي والعلماني وحتى الشبيح. لم أكن لأحذفه من صفحتي لأنني كنت اعتقد أن في داخل كل واحد فينا مازال هناك بقايا لأيام قضيناها معا تحت سقف واحد. لذا فإن كل اتهاماته وهجومه لم يكن ليشعرني باي نوع من الاستفزاز ذلك انني لا اعتقد أن اي من التسميات السابقة قد تكون تهمة او جريمة بل هي نيشان اضعه على صدري حتى التشبيح فهو بمثابة الملائكية بمقابل ما نراه كل يوم من ذبح للرقاب وقتل بالجملة من توجهات الاسلام السياسي والجماعات الإرهابية التابعة لها وبمقابل ما قدمه لي من عرض يؤكد فيه على أننا بالنهاية لسنا مواطنيين وأننا كلنا بأقل تقدير مطرودين من بيوتنا كما فعل الدواعش بأهل الموصل المسيحيين.

المخيف أن عدد اللايكلات التي تجدها على مثل هذه المنشورات كبير وعدد منها يكون لأصدقاء او جزء من عائلتك فكيف لنا أن نثق بأننا بعد زوال الأنظمة قد نكون محميين؟ وأي أمان هذا الذي قد نستشعر به ونحن نرى اصدقائنا يشعرونا بهذا التهديد؟  لذا فقد تكون الأنظمة السابقة دكتاتورية وقد تطون استخدمت وتستخدم أدوات كثيرة من تعذيب واستغلال بهدف قمع المعارضين، وحتى تصفيتهم، ولكننا على الأقل كنا نجابه عدو قادرين على معرفة حدود إجرامه ونستطيع في الكثير من الأوقات التعامل مع شروره وتجنبها ومحاولة الضغط عليه لتحصيل مساحات اكبر من الحرية لنا وقدرة أكبر على المسائلة. وكنا نعلم أننا إن لم نتجاوز هذه الحدود فلنا أن نعيش.

اليوم عدونا لا حدود لشروره ولا مقدرة لنا على مسائلته او التفاوض معه، اليوم عدونا تجاوز كل الحدود الإنسانية واستخدم كل الأدوات الإجرامية واستغل كل الكائنات الحية، اليوم يستخدم عدونا الأطفال والنساء ويسكن المساجد وبيوت الله. فلم نكن بيوم نتوقع ان نرى هذه المشاهد المقززة من نحر للرقاب وتقطيع للرؤوس وقتل بالجملة واغتيالات على الهوية وكل هذا بإسم الله أكبر.

كيف لنا أن نحارب سرطان الطائفية والكراهية هذا وهو  يتغلل بداخلنا كل يوم باسم الدين والله. كيف لنا أن نجابه هذا السرطان وهو يستخدم ضدنا الأطفال والأصدقاء والعائلة ويحملهم أسلحة ليذبحونا بها بدم بارد وبشعور تام بالراحة وهداة البال أنهم قاموا بإعلاء كلمة الله وقتل الكفرة الخوارج.

يقال أن هتلر لم يكن خائفا من العرب فهو كان يعتقد أن العرب سيقلون بعضهم البعض اليوم فإن سكين الطائفية غرست بداخل قلب هذه الأمة وهي تنزف منهكة وقد قاربت على الموت فهل ستتحقق نبوءة هتلر أم اننا قادرين على اخراج انفسنا من هذا المأزق؟

المزيد...

بين فكي الكماشة

نتائج الحرية والديموقراطية الكاذبة

 
مع كثرة اخبار الموت اليومية شاهدت خبرا وصورة عن موت احد المعتقلين في السجون المصرية عرفت لاحقا انه استاذ بجامعة عين شمس اعتقل لإنتمائه لتيار الاخوان المسلمين.

وبغض النظر ان كان موته بسبب المرض اما بسبب الاهمال الطبي او حتى الموت بسبب التعذيب فإنني لا اقبل باي شكل كان ان يعتقل شخص فقط لانتمائاته السياسية ودون اي تهمة حقيقية فكيف لي بقبول موته. إلا أنني رغم رفضي القاطع لإعتقالات قيادات وكوادر الإخوان المسلمين، إلا من عليه قضايا حقيقية او اتهامات واضحة، فإنني اخاف الوقوف مع حقوق هؤلاء السياسية ذلك أن تجربتنا معهم في سوريا وليبيا واليمن وغيرها جعلتنا نعلم ان التيارات السياسية الاسلامية ان لم تستطع تحقيق رغباتها السياسية فهي مستعدة لتدمير الدولة بمبررات واهية وذلك من خلال تنشيط خاليا تكفيرية مسلحة وتغطية إعلامية خلاقة في الكذب.

يقول فرانسيس فوكوياما "ليس ثمة ديموقراطية بدون ديموقراطيين، اي بدون انسان ديموقراطي يرغب في الديموقراطية ويكيفها في الوقت الذي تكيّفه الديموقراطية فيه" فما يحصل اليوم هو نتيجة للازمة الاخلاقية في الداخل العربي فكل يبرر همجيته بطريقته اما بالعلمانية او الدين وكلاهما، أي الدين والعلمانية، بريئان من هذه الجماعات. كما أن كلاهما ليس ديموقراطيا ولا يبحث عن الديموقراطية إنما يستخدمها للوصول إلى أهدافه بوأد الحريات وقمع الشعوب واستغلالها.

وما يجعل من الأمور أكثر صعوبة علينا أننا غير قادرين على ممارسة الحرية مع عدم وجود تيارمعتدل قادر على خلق توازن في الدولة فالحرية كما يعرفها ايميل كريه هي القدرة علي الاختيار إلا أننا نعيش اليوم بين فكي كماشة فاما دكتاتورية العسكر او اضطهاد التيارات الاسلامية السياسية وليس لنا الا انتظار دورنا في طابور المعتقلين او حتى القتلى في السجون او المعدمين بسيوف مدعي الدين، وحتى ذلك لنا ان نعيش الامل، الحلم بانا قادرون على التغيير

المزيد...

تحديد المفاهيم: داعش منا وفينا

داعش منا وفينا

ذكرت في التدوينة السابقة أن الإسلام ليس دين إرهاب وإنما المسلمين هم كذلك. وأن ما تقدمه داعش من أفكار وتقوم به من تصرفات لا يختلف كثيرا عما بدر من تصرفات وما تم نشره من أفكار لجماعات الإسلام السياسي المسيطرة في الوطن العربي مثل الفكر السلفي والإخوان المسلمين وغيرهم.

بالأمس أعلنت كتائب الفاروق التابعة للجيش الحر، المرتبط بالإخوان المسلمين، مبايعتها لداعش وكذلك كانت العديد من الفرق  الجهادية في سوريا تتبدل من راية جهادية للأخرى. إن كتائب الفاروق لم تغير أساليبها أو أدوتها ولن تغيرها بتغيير القيادة والمرجعيات، فكل مرجعيات الإسلام السياسي تتوافق بشكل أو بآخر على قضية مهمة تزرعها في داخل المجتمعات العربية وهي إيجاد المبررات لشرور الأعمال، فحسن النيات يبطل شرور الأعمال ولذا فإن قتل المختلفين معنا بالرأي او التوجهات او إيذائهم خير، ذلك أنهم أعداء الله والإسلام.

ما ينطبق على الفرق السنية ينطبق أيضا على الفرق الشيعية ذلك أن منبع هذه الأفكار لا علاقة له بالدين الإسلامي بل مرتبط بشكل مباشر بتاريخ الدولة الإسلامية السياسي والإختلافات السياسية والتي أثرت بشكل مباشر على مفهومنا للنصوص الإسلامية بل وحتى بالنصوص نفسها.

في حياتنا اليومية إعتدنا ان نبرر لتصرفاتنا اللأخلاقية بل ونكابر عليها، فسائق السيارة يبرر لنفسه اتخاذ مسارب غير صحيحة للوصول لبيته بسرعة بل ويعتبرها شطارة. والتاجر يعتبر من الشطارة خداع الناس والكاتب يبرر مواقفه المتأرجحة بين رؤوس الاموال والمصالح ليترزق كما هو من يغلق الطريق بعربة بضائعه او يغلق رصيف المشاة بسيارته أو من يقف مزدوجا ليؤدي صلاة الجمعة.

الداعشية لا يميزها قطع الرؤوس بل تتميز بقلة الوازع الأخلاقي وتبرير الشر بحسن النوايا وهذا ما يميز بالغالب جماعات الإسلام السياسي وهو ما يجعل منا (دعاديش) صغار او فراخ دعدوشية.

فداعش منا وفينا وليست صناعة أمريكية بل استثمار امريكي لبضائع محلية الصنع.

المزيد...

تحديد المفاهيم: الإسلام ليس إرهاب

الإرهاب لا دين له

 لنكون واضحين يجب نحدد المفاهيم فالإسلام ليس دين إرهابي ولكن العديد من المسلمين هم كذلك، أي إراهبيين. وإن استخدام هؤلاء للنصوص الدينية كمبرر لإجرامهم لا يعني أن الدين مجرم، فالنصوص نفسها التي استخدمتها المسيحية في تبرير التوحش الديني في عصور الظلام هي نفسها التي استخدمت لاحقا لتبرير العلمانية والتسامح. النص هو نفسه جامد لم يتغير ولكن الرغبة في إيجاد مبررات وحلول لمشاكلهم هي التي جعلت للنص الديني مفهوما جديد.

إن قوة داعش الحقيقية بأنها استخدمت النصوص نفسها التي تعلمناها وكبرنا معها ولكنها لم تسخدم أدوات التجميل كما فعل الإسلام السياسي. كل ما هنالك أنها فسرتها بكل البشاعة التي تحتاجها لتبرر حاجتها لدولة لطالما حلم بها الشعب العربي. وهذا ما جعل لداعش مؤيدين كثر في شوارعنا العربية فهناك حاجة كبيرة لدولة قوية تقف في وجه الأعداء الخارجيين، وعلى هذه الدولة ان تتصف بالصفات الإسلامية التي تعلمنها وتستخدم النصوص التي درجنا عليها لذا فما الخطأ في داعش؟؟؟

الخطأ ليس في داعش بل في أعوام من التضليل الإعلامي وصناعة المتناقضات فنحن دين سلم وسلام ولذا نحارب الجميع ونضطهدهم باسم الإسلام، إلا ان ذلك لا يعتبر اضطهاد بل يعتبر هداية.

هذه المبررات التي استخدمتها جميع التيارات الإسلامية السياسية من إخوان وسلفية وغيرهم هي التي صنعت من النصوص الإسلامية أسلحة كراهية وقتل وإراهاب.

المطلوب الآن من المتنوريين الإسلاميين صناعة مبررات تساهم في صناعة مفاهيم انسانية من النصوص الإسلامية. إلا أن طريقهم ليس سهل أبدا بل طويل وصعب ولكن مهمتم واجبة لإنقاذنا من طاغوت الإسلام السياسي من إخوان وسلفية.

المزيد...

خطة طواريء أردنية

محاولة إخراج سيارة محصورة بالثلوج بالأردن

دخلت أليكسا منطقة بلاد الشام وغطت الثلوج المملكة وهبت العائلات من كل مناطق الاردن إلى الشوارع لتسقبل الزائر الأبيض وتداعبه رغم التحذيرات بإغلاق الطرق إلا أن المواطنين خرجو بكثافة وما كان إلا ان حشرت مجموعات كبيرة من السيارات بين الثلوج ولساعات طويلة.

قبل بداية العاصفة أليكسا بدأت التحذيرات بخطورة الموقف كما تم الإعلان عن غرفة طوارىء على مدار الساعة ستعمل على فتح الطرق الرئيسية وتساعد على إدارة الإمور والتعامل مع العاصفة بشكل فعال وخاصة بالعاصمة عمان. إلا أن الاردنيين تفاجئوا بأن الطرق ولساعات طويلة لم تفتح وأن العديد من المواطنين لم يهتموا لكل التحذيرات وخرجوا خلال العاصفة وحوصروا بالثلوج لساعات طويلة.

ألقي اللوم على تهور هؤلاء وعلى عدم التزامهم بالتحذيرات وأن انحصارهم بهذا الشكل سبب في ارباك أجهزة الأمانة والدفاع المدني وعدم قدرتهم على التعامل مع المأزق بسرعة.

لا يمكن إنكار أن خروج المواطنين مربك وخطأ ولكن لنراجع الموقف بشكل منطقي وعلمي :

أولا: فإن الجهات المختصة بالاردن تقوم بنفس التنبيه لأي منخفض ثلجي مهما كانت قوته وبالتالي مع خبرات المواطنين الأردنيين بكثافة الثلوج في المنطقة توقعوا ان ما سيصيهم هذه المرة لن يتجاوز كثيرا ما يصيبهم كل عام. وهذا ما شجع العديد على الخروج والتعامل مع الموقف بنوع من الاستهتار.

ثانيا: إعداد غرفة الطوائ من الواضح انه لم يتم بطريقة تتوائم مع واقع وخطورة العاصفة القادمة على البلد فغرف الطوارئ أنواع تأتي حسب خطة طوارئ معدة من قبل البلديات المحلية او المحافظات والوزارات المختصة . وبناء عليه يتم إعداد فريق بصلاحيات تتناسب مع الحاجات التي تحتاجها الحالة. 

فهذا ما يجب أن يكون عليه الوضع، فهناك مستويات للعاصفة او الحالة الطارئة تعلنها جهات مختصة وبالتالي سيكون هناك أيضا مستويات للتحذيرات ومستويات واشكال لغرف الطوارئ يتم التعامل معها بشكل اوتوماتيكي، فحسب الخطة يعلم الجميع ما سيقوم به وما لايجب القيام به حسب ما هو موثق بخطة الطوارئ وحسب ما يتم التعميم  به على المواطنين والجهات المختصة وتدريبهم عليه من خلال قنوات مختلفة وبطرق متنوعة. وعندها فقط يمكن العتب على المواطنين لو تجاوزوا كل هذا وخرجوا للشوارع.

أما غرفة الطوارئ فيجب ان تكون معدة من فريق مشترك بين البلديات والدفاع المدني والمستشفيات  ويتم من خلاله إعداد فريق مع بعض المؤسسات والشركات الخاصة بالإضافة لفرق متطوعين مدربين وإعلاميين. و أخيرا فأن لغرفة الطوارئ تواصل مستمر مع قيادة الجيش للمساعدة في بعض الحالات الخاصة خيث يمكن أن تطلب مساندة الجيش بأدواته ومعداته. كل ذلك يكون معد ومخطط له ومنظم بخطة الطوارئ.

هذا ما يجب أم في الأردن أستطيع أن أرى الطريقة التي تم فيها إعداد غرفة الطوارئ : ابو فلان بالله عليك جمعلي الشباب وخليكم جاهزين ترا جاينا منخفض خطير ولا تنسى تحكي مع ابو فلان وتشوفلك كم جرافة يساعدو بفتح الطريق وابعتو التحذيرات للإذاعات ... وصلامة تسلمك حلينا المشكلة.

المزيد...

مذكرات ابو جمعة الحلقة - حكومة عون (20)

بتعرفوا قديه بحب ابو السعيد بس اليوم شوية وكنت قايم اضربو . الصحيح انو  الرجال فهمان وصراحة بالاخير طلع معو حق بس كمان مش هيك .
هذا القصة يا طولين وطويلات العمر  اليوم قاعد مع ابو السعيد في البيت وبنسولف. وإذ بعون بلقي اليمين الدستورية. طبعا انا بدي اتفلسف بتعرفوا كعادتنا احنا الاردنين بنفهم بكل شي. وفبن ما تحطنا بتلاقينا بنتفلسف.
المهم قلت لابو السعيد والله هذا عون شكلو جاي يعمل اصلاح بجد ... شو رايك انت؟
-    لا اصلاح ولا بطيخ متلو متل غيرو.
-    يا زلمة انت دايما متشائم ما سمعت شو حكى انو جاي  بضمانات بكامل الصلاحيات للحكومة.
-    حكي يا زلمة ... حكي ... كلو حكي فاضي.
-    يا زلمة بقولك انتوا كلكم متشائمين
-    مين كلنا؟
-    المعارضة ... مين يعني؟؟ بس شغل تفشيل وانتقاد.
-    هلأ انا بس شغل انتقاد يا ابو جمعة؟ يا سيدي بكرة بذوب الثلج وببان المرج.
-    مرج اخضر اكيد ... يا اخي اعطوا هالحكومة فرصة تتنفس وبتشوف شو رح يطلع منها.
-    ريتها تطلع روحك يا بعيد ... شو بدو يطلع منها ؟؟؟ هاااا
-    يا اخي رح يطلع اكيد
-    ما رح تكون غير عن اللي قبلها.
-    ولك نفسي افهم ليه هيك واثق من حالك.
-    بدك تفهم؟
-    اه طبعا ... اشوف كيف بفكروا تعون المعارضة هدول تعونك.
-    انا بحكي عن حالي ... ما الي في حد ... بدك تفهم مد ايدك لاشوف.
-    ايدي؟
-    اه ايدك مدها المكسورة
والله انا مديت ايدي بكل براءة . قام سافقني كف على ضهر ايدي طلعت روحي منو.
-    ولك ليش هيك
-    لا هاي مزحة ... هات ايدك خلص ما رح اضربك.
والله وجيت ايدي مرة تانية. وطرااااخ كبسني كف مرة تانية دمعت عيني. وعصبت عليه.
-    ولك شو مالك متل الاطفال صاير ... وربي لو انك مش في بيتي لتصرفت شي تاني.
-    يا زلمة مالك حساس اكتر من اللزوم بمزح معك ... خلص والله المرة هاي ما رح اضربك ... هات ايدك مدها.
-    شو مفكرني اهبل ... انت اليوم شكلك مش مزبوط ... ما رح مدها بالمرة.
-    وليش دخلك؟
-    لانو رح تضربني.
-    و ليه واثق يعني من هالحكي؟
-    شو ليش؟ يعني كل ما امدلك ايدي بتضربني.
-    يا اخي اعطيني فرصة هالمرة بس.
-    ابدا لا يمكن.
-    شفت كيف يا محترم؟
-    كيف شو؟
-    كيف بنفكر احنا .... يعني لما تمد ايدك اول مرة وتاكلها وتاني مرة وتاكلها بدك ايانا نمد ايدنا مرة تالتة وما نتوقع ناكلها؟ الحكومة يا سيدي اجت متل اللي قبلها بنفس الطريقة ونفس الناس تقريبا ... هم نفسهم ما تغيروا وبدك نتوقع منها تكون غير؟
-    ابو السعيد؟
-    خير يا طير.
-    تضرب يعني كان لازم تسفقني على ايدي لافهم؟
-    اللي متلك بدهم كسر روس كمان.
-    في منو والله
وانتوا شو رأيكم متوقعين تطلع غير يعني؟

المزيد...

مذكرات ابو جمعة الحلقة - في الإعتصام (19)

قبل كم يوم كنت نازل على وسط البلد يوم الجمعة، أتخمخم، ترا انا بحب الخمخمة في وسط البلد. خاصة يوم الجمعة. البسطات هناك حلوة. وكل جمعة إلى ما أفقعلي طوشة مع ام جمعة.
-    ليش جايب هاي الزبايل شو بدنا فيهم ؟؟؟
-    شو زبايل هاي حقها ليرة ... شوفي.
-    الله يحرمك اياها نزلة البلد الخمخمة تاعتك.
وشكلو الله سمع منها ... يا ريتك يا ام جمعة خبيرة في الدعاوي على اليهود متل ما هو علي.
والله ونزلت قبل كم يوم على البلد. قلت بصلي في المسجد الحسيني وبطلع بلف شوية على البسطات. لقيت ناس كتير هناك استغربت. قلت الله هاديهم ما شاء الله عليهم.
والله وخلصت الصلاة من هان وما سمعتلك غير واحد بقول بصوت عالي: تكبيييييييير ... والناس من وراه بتقول الله اكبر.
أقولكم الصراحة انا مش فاهم شو  في ... والصراحة استحيت أسأل ليضحكو علي. قلت يمكن اعتصام لفلسطين ولا شي من هالحكي وعيب علي ما اعرف خليني ماشي معهم شوية وبعدين بفرجها الله.
تطلعت كانوا شي 500 واحد قلت فلسطين ضاعت كمان مرة. بس 500 ولكم على طابور الخبز يوم الثلجة بتكونو أكثر. بعدين تذكرت اني جاي بالصدفة استحيت من حالي.
شو بدكم في طولة السيرة ركاض على الصف الأول من المظاهرة وبدي ابلش هتافات.ومحسوبكم هتيف من الطراز الرفيع. أيام المدرسة كنا نطلع اعتصامات لفلسطين وكنت مبدع. مهو بصراحة حجة بحاجة يعني علشان ما نكمل دوام الدراسة. وأيام الفطبول كنت هتيف مبارايات معروف.
المهم، لما وصلت اول الطابور الا هي كل الشعارات عن الاصلاح. قلت أبوك يالاصلاح ... شو اصلاح ما اصلاح ... خليني اهرب احسنلي.
وحملت حالي وبدي اتركهم الا هو صف درك من اللي بحبهم قلبكم. اقصر واحد فيهم ركبتو  بتوصل نص صدري.
اكون صريح معكم كنت كتير مزنوق ... وماسك حالي على الشحطة.
تطلعت بصف الدرك من قدامي وصف المعتظاهرين من وراي لقيت حالي بالنص متل السندويشة. المعتصمين بحكو حرية وسلمية وما بعرف شو ... والدرك ماسك القناوي وبدق على الترس ... صوتهم بخوف.
طبعا بين حانا ومانا ضيعنا لحانا ... ما لقيت غير الدرك هاجم ... وانا مش عارف انفد ... تطلعت شفت واحد ضخم بقولي بدك تعتصم يا كلب؟
كلب ... كلب مو مهم بس ما تضرب ... قال اني شجاع يعني.
بصراحة انا بعديها مش متذكر شو صار ... صحيت لقيت حالي في المستشفى وراسي ملفوف. ووووو ... بالله عليكم ما تفهموني غلط ... بس لاني كنت مزنوق مش أكثر ... شكلي لما اغمى علي فلتت.
بس الحلو لما تطلعت جنبي لقيت الدركي اللي قلي يا كلب في السرير الجنبي ... مطبوش ...  قلت بحالي شكلي  لما بعصب بعرفش شو ممكن أعمل ... خليه مش قلي كلب ... يعرف انا شو بقدر أعمل.
مش قليل أنا بعجبكم ... بس مش دايما بعملها على حالي

المزيد...

مذكرات ابو جمعة الحلقة - زائرة الليل (18)

زمان ما كتبت مذكراتي يمكن الاشغال او انشغال البال ... يمكن كنت مضيع القلم  ... او مضيع المذكرة الخاصة فيي  ... بس اليوم صحيت لقيت كل شي موجود ما عدا كوباية الشاي  ... فقلت خليني اكتب شو صار معي مبارح بالليل ... خاصة اني ما عرفت انام طول الليل  .

مبارح من العصر وهي عندنا ... حسيت بنظرتها نظرت لئم وخبث ... حتى حركتها كانت كلها استفزاز وكانت تحاول تقرب مني ... واكتر من مرة بعدتها عني بجد بكره هالضيفة هاي تقيلة دم وبتلزق بالواحد ما بتتركو  .

بالليل رحنا نمنا انا و ام جمعة ... فجأ سمعت صوت هيك في الغرفة عرفت انو هي ... يخرب بيتها شو دخلها هون ... خفت ام جمعة تصحا علينا ... خاصة انها كانت ميتة من التعب طول اليوم ... قررت اني ما انام واضل اراقب حركتها وابعدها عني ... وضلت طول الليل وهي تحاول تقرب مني وانا اتحرك علشان تحس اني بعدي صاحي  ... وضليت هيك لحتى غلبني النوم وغطيت في نومة ونسيت الموضوع كلو  .

وفجأة صحيت منتفض وسمعت صوتها ببعد عني ... اخخخخخخ ... بنت الكلب ما لقيت غير هذا المكان تقرصني منووووو ... وربي بكره النمووووسسسسسسسس وقرصة النموس و القارص ... قررت اني اشتري بف بف او فيب علشان اعرف انام وانا مرتاح وما ازعج ام جمعة.

شو رأيكم في هالليلة المخيفة هاي 


كتبت 22-8-2007

المزيد...

مذكرات ابو جمعة الحلقة - سلطة (17)

والله الحياة صايرة صعبة كتير نزلت اليوم على سوق اشتري شوية خضرا وفواكه ... ام جمعة معطيتني قائمة طويلة الها اول ما الها اخر ... والله  ونزلت على السوق ومسكت القائمة ... شو هذا بدها عدة السلطة ليمون وبندورة وخيار وخلافوا ... دخلت بدي اشتري بندورة الا هي الكيلو ب 85 قرش 
طبعا انصرعت وكل الخضار غليان ... فقررت انو عمرين السلطة ما تاكلت وحملت حالي وروحت ... دخلت البيت الا ام جمعة بتشوف شو جبت :
- ابو جمعةةةةةةةةة ... فين الخضار ... في البندورة والخيار  .... بدنا نعمل سلطة شايف اكلنا اليوم مقلوبة وبدون سلطة مش زاكية.
- ام جمعة جبتلك تفاح كلي منو ارخص من البندورة شفتي ما احلاه الرطل بدينار بجنن 
- ابو جمعة شو دخل التفاح في الموضوع  بقولك بدي اعمل سلطة
- يا مرا لا تصيحي عاد ... سامعك وفاهمك بس كيلو البندورة ب 85 قرش يعني السلطة بتطلع اغلى من الطبخة كلي لبن وبلا السلطة هالاسبوع
- ابو جمعة  عارف اني ما بحب اللبن مع المقلوبة بدي سلطة
- بدك سلطة ومصرة يعني ؟؟؟؟
- اه 
- طيب اعملي سلطة فواكه اوفر النا وافيد ... عندك تفاح وموز وانجاص و شو بدك فيه شوفي ما ازكاه.
- 
- شو مالك مش عاجبك 
- ابو جمعة صاير تتفلسف كثير 
- اها فهمتك ... خلص من عيوني احلى سلطة ملفوف  ... مش اوفر هيك

Apr 11 2007, 01:14 PM

المزيد...

مذكرات ابو جمعة الحلقة - للبيع؟؟ (16)

اما صار معي فصل في هالعيد من الاخر 

طبعا محسبوكم إلو 5 خوات وكل اخت في مدينة ومحافظة شكل ... يعني اول يوم العيد طيران ما بلحق من مكان لمكان

علشان هيك بكون معصب وبسوق بسرعة 

واي حد بيجي في طريقي بالعيد يا ويلو ما بخليلو ... وطبعا كلو من الزنار ونازل 

واحيانا بصير ادخل عليه واجاكر فيه لانو حمااااااااااار وما بعرف يسوق ... كيف يدخل علي هالدخلة

المهم اول يوم العيد بعد ما خلصت زياراتي بعيدة المدى ... وانا في طريقي لاخر اخت الي الا واحد داخل علي في سيارتو دخلة استهتار ولا كأنو اللي جنبو بني ادم

عصبت وحمي دمي وصرت اطعج فيه... وازمر ... اطلع علي هيك بطرف عنيه وراح اشرلي بقفى ايدو ... باستهزاء 

عصبت وفقعت معي ... ورحت لحقتو بدي العن ابوه وابو اللي جابو ... ووراه في السيارة ولزيت عليه وزمرتلو ... وصرت ااشرلو يوقف 

المهم الزلمة فقع بريك ووقف ... وانا على طول نزلت ... ولسا بدي اقرب من سيارتو الا هو نازل

اول مرة بحياتي بشوف حيط بشري يا اخوان 

انا شفت المنظر قلت اهرب بكرامتي ... بس الناس وقفت تشوف شو الموضوع ... يعني من الاخر فضيحة علنية ... رح اكل اكم كف وشلوت من الاخر واروح على البيت باحترامي ... بس خطرت ببالي فكرة

المهم الزلمة نط وبحكيلي

- شو مالك بتزمر هيك زي الحمار

- انا حمار الله يسامحك ... يعني عمرك شفت حمار بركب سيارة يا زلمة 

- لكان ليش هيك دخلت علي

- لا بس عجبتني السيارة ... للبيع ؟؟

- لا مش للبيع ... اما عالم هيك اللي بدو يشتري سيارة ... روح عمي روح الله معاك

- شكرا سيدي بدك شي 

- لا بس افتح الطريق سكرتها

- ولا يهمك سيدي انت بس اامر وانا جاهز ... مع السلامة 

عمري ما بعيدها يا اخوان 

01-05-2007

المزيد...

مذكرات ابو جمعة الحلقة - أبو السعيد (15)

من اسبوع وابو السعيد مش مبين ومختفي ... برن عليه على موبايلو ما برد ومش مداوم من اسبوع

من يوم ما كنا بنكزدر في الشارع ... وكانت مطر خفيف قبل اسبوع ... كان لابس دشداشة جديدة الاخ ... بس كان معصب كتير ... عندو مشاكل من كل الانواع ... وفجأة واحدة ... بنص السوق ... الا سيارة دعست على حفرة صغيرة فيها شوية مية وسخة ... طبعا كلها اجت في ابو السعيد المسكين

اول مرة بشوف وجه ابو السعيد بصير هيك

واول مرة بسمعو بحكي هيك كلام

- (كلام محذوف بسبب الرقابة ) اصلا الحق مش عليك (قصدو عسواق التكسي) الحق على الحكومة ... لو الحكومة صلحت الشارع كان ما صار هيك

طبعا الرجال لاول مرة بعلي صوتوا هيك ... كان عالي كتير

- ابو السعيد روق وطي صوتك احنا بالشارع ... بلاش حد يسمع نروح فيها

- ولك اصلا انت عمرك شفت دولة شوارعها عبارة عن حفرة متحرك زي هيك ... و بحملونا جميلة بجسر عبدون ولكم بدل ما تعملوا انفاق وجسور بالملايين على الاقل لما نعمل شارع ما يكون طالع ونازل

وفوق هيك على كل شي ضريبة حتى على الضريبة عاملين ضريبة ... انا مش فاهم شووووووو هذا كل شي غالي نار والاسعار بارتفاع

- ابو السعيد الله يرضى عليك خلص شو مالك فتحت

- يا اخي بتلاقيهم عاملين شو ... ضريبة تلفزيون على فواتير الكهربا ... اي هو في حد بتفرج على تلفزيونهم ... يا عمي سكروووووووووووو ما بدنا تلفزيونات ... يعني معقول التلفزيون الاردني بحتاج كل هالمصاريف هاي ولاااااااااا علشان .....

- انسى يا عمي

- وعندك ضريبة جامعات سمعت كمان بدهم يعملوها على الموبيلات ... يعني طالب الجامعة ابو موبايل بدو يدفع ضريبة وهو بدرس ... والمصيبة انو الجامعات الخاصة فيها طلاب اكتر من الحكومية يعني اذا ولد الك درس في الحكومة مقابلو ولد تاني في الخاصة اذا مش كلهم في الخاصة لانو انت مش من الاقل حظا اموت واعرف ليش بندفع هاي الضريبة وروسم الجامعات الحكومية قربت على الخاصة كتير ... وياريت بجيبوا اجهزة للطلاب ... لا روح شوف موازنة الطبيخ والعزايم في الجامعة الا....

- ابو السعيد خلصصصصصصصصصص

- يا اخي ولا ضريبة المبيعات ... يا اخي بدل ما نلغيها عن الاشياء الاساسية ... لا بتلاقي الحكومة بتعمل ضريبة على كل شي ... يا اخي كيف بخترعو قوانين الضرايب وقوانين المخالفات ما بتعرف كيف ما بتلف بتلاقي حالك دافع ضريبة ... بعدين

- ابو السعيد (وكبستو كف خفيف على وشو)

لقيت الرجال نفض زي اللي صحي من النوم ... اتطلعنا حولينا لقينا الناس حولينا ... وبلشت تزقف

ابو السعيد تطلع علي نظرة غريبة ... وفجأة واحدة رفع الدشداشة وحطها بين سنانو ... وهات يا ركاض ... وانا حاولت الحقو ما في فايدة من يومها ابو السعيد مش مبين

حسيت انو الحادث البسيط هذا كان الشعرة اللتي قصمت ظهر البعير عند ابو السعيد

بالكم يا اخوان ممكن يوم تيجي هاي الشعر وتقصم ظهر المجتمع وتخليه يقول لا للغلاء

بس بدكم الصحيح خايف نطلع زي ابو السعيد ونحط ذيلنا بين سنانا ونقول يا هريبة

والهريبة ثلثين المراجل

12-27-2006

المزيد...

مذكرات ابو جمعة الحلقة - أفنان (14)

اليوم افنان الزعرة موتتنا من الخوف عليها ... كانت تلعب بقلم حبر ماخديتوا من جيبتي وهووووب الا هي بالعة الغطاية وعلقت في زورها

والله وام جمعة شافت المنظر وهات يا لطم وحملنا البنت وعلى اقرب مستشفى على السريع

دخلنا المستشفى وعلى الطوارئ

- بدنا ندخل البنت بلعت غطاية قلم ونفسها ضاق ... الله يرضى عليك بسرعة

طبعا الاخ وبكل برودة اعصاب اول شي لازم تمر على المحاسب هناك

- يا رجال انا مأمن لا تخاف

بدور على البطاقة ما لقيتها ...ناسي بطاقة التأمين تاعتها في مكتبي ... والمستشفى تنح هاي بدها عملية علشان نطلع الغطاية وبدنا تأمين 300 دينار

- ولك منين 300 دينار على المسا

- ما بعرف ما بتدخل البنت الا لما تدفع الفلوس

- ولك البنت مصفرنة وبدها تنخنق وربي اذا بصير فيها شي لاسكرلكم المستشفى

-(بصوت مش واضح وبرطمة) اعلى ما فخيلك ... (بصوت واضح) ادفع 300 دينار او احكي مع المدير

- فين المدير هذا دلني عليه

- هي مكتبو اخر مكتب على اليمين

المهم رحت على مكتبو ... بس كمان استفقدت ام جمعة يعني ما الها حس وانا بعرفها في هاي الظروف صوتها زي زمور الخطر ما بتسكت

والله ودخلت على المسؤول ربع ساعة وانا اتناقش معو لما اقتنع ... طلع صاحب ابن عمة ابو السعيد

وركاض ادور على ام جمعة

- فينك يا مرا

- انت اللي فينك الي ربع ساعة بدور عليك ... يلا نروح

- كنت عند المدير وخلص خلي افنان تدخل

- بقلك يلا خلص

- شو خلص هاي والبنت رح تموت الي ساعة بطارد من مكتب لمكتب

- خلص طلعت الغطاية من حلقها ... لما شفت الموضوع طول دخلت على غرفة النيرس لقيت ملقط معقم ... اخدتوا وسحبت الغطاية

- مستحيل لا خلينا نصورها نتأكد انو ما فيها شي

- هيها زي القردة ما شاء الله عليها ما فيها شي

- اشوفها

الا هي افنان جاي ركاض علي

- بابا ... بابا ... بدي بوظة

- بوظة!!؟؟  اذا هيك ما فيكي شي هلأ بيجبلك بوظة واحنا مروحين

قال 300 ليرة قال!!!!!!!


12-24-2006

المزيد...

مذكرات ابو جمعة الحلقة - الصوبة (13)

والله ما صدقت على الله يكون يوم عطلة وقلت بقعد وبنام وبتدفى تحت الحرام ... قلت مش قايم لو شو ما صار حتى الاكل رح اكل في الفراش ... برررررد

والله شوية الا صوبة الكاز طافية

- ام جمعة ... ام جمعة ... الله يرظى عليكي عبي الصوبة

- ما في كاز روح جيب كاز يلا

- شوووووووووو معقولة اول مبارح عبيت كاز بسبع ليرات ... شو الدعوة بتشربوا انتوا

- شو اعملك يعني ... بدكاش تعبي كاز بلاش ... انت حر ... خليك في البرد

- طيب خلص مع انها ما بتدفي كتير... بس جيبي صوبة الغاز

- صوبة الغاز عند جمعة في الغرفة بدو يدرس خليه دفيان بلاش يمرض

- يم سكرتيها من كل الجهات

- شو اعملك الكاز بطل فيه بركة اللي كنا نعبيه السنة الماضية ب 3 دنانير صار ب7 تقريبا ... والغاز مو كتير بتدفي الا على شعلتين او او تلاتة يعني مصروف ... والكهربا مش مضمونة كل يوم بتقطع صايرة لانو الكل عندو صوبات كهربا ... روح جيب كاز خلصني

وفجأة اجتني فكرة نارية ... وفعطت وجبت السيبة وعلى السدة على طول ... وهات يا تفتيش ونعكشة في الاغراض... وام جمعة على صوت واحد

- على شو بتدور يا زلمة ... انت بس قولي

- اهاااااا ... واخيرا ... هيو

- شو هذا

- هذا كاانون

- طيب لشو هذا

- يا ختي بقلك كانون ... سموه كانون لانو الناس كانت تكنكن عليه بالبرد زمان

- طيب شو يعني ليش طلعتو

- ولا اشي هسع بشغلو في البرندا ... وبنتدفا عليه ...

- يا فالح والدخنة تاعتوا بدك تئلعط البيت ... مهو مش انت اللي بتتعب بالتنضيف

- يا ام جمعة ... مهو اوفر بكتير ... ما النا احنا المساكين غيرو ... اقلك عندي فكرة احسن كمان

شو رأيك اجيب برميل من الكبار الحديد ونخزقوا بسامير 10 ... ونولع فيه علشان نتدفى والله بدفي البيت كامل ... ولا تخافي بحط فوقوا شفاط زي اللي بحطوا فوق صاج الفلافل ... يعني الموضوع قصة 200 ليرة بالكتير والحطب ولا اشي بجيبوا ...

- ابو جمعة

- نعم ستي

- قوم جيب كاز

- حاضر ستي ... بس مع هيك مش عارف ليش مش عاجبيتك الفكرة

- بعدين

- اسف

12-20-2006

المزيد...

مذكرات ابو جمعة الحلقة - بوس الواوا (12)

ياااااااااه زمان والله عنك يا مذكراتي بجد اشتقتلك . بس انشغلت الفترة الماضية شوية

اليوم ابو السعيد كعادتو علمني درس جديد في السياسة والطرب

هاظ دخلت عليه مبارح لقيتو معلي صوت المسجل ومشغلي بوس الواو وسرحان الزلمة

- ولك شو هذاااااا وطي الصوت الله يقطع هيك اغاني ... من متى بتسمع هاي الاغاني الهابطة يا ابو سعيد

والله ومديت ايدي ووطيت الصوت نط ابو السعيد هيك وهو معصب :

- ولك ليش هيك حرام عليك خليني مندمج 

- ولك يا زلمة بشو مندمج هي هاي اغنية ... بدل ما تسمع الاخبار ... مش شايف شو بصير بالعراق واللبنان او حتى اللي بصير فينا احنا المواطنين

-يا عمي ما هاي الاغنية وطنية ... وبتعبر عن كل السياسة العالمية والوضع السياسي في الوطن العربي

- يا حبيبي طقوا فيوزاتوا الرجال

- يا عمي مالك انت ... هلأ الوضع في لبنان شو الحل تاعو برأي الحكومة اللبنانية ... مش انو نعمل محكمة دولية علشان نعرف قاتل الحريري

- طيب وشو دخل هذا بموضوع بوس الواوا

- بلاش يا سيدي خلينا نحكي عن العراق ... شو الحل في العراق من نظر الحكومة العراقية عمالهم بحكاموا بصدام من سنتين صح ؟

- كمان ما فهمت ... شو مالك يا زلمة اليوم انت

- يا عمي الشعب عندنا مش الحكومة بتغلي الاسعار لكل المواد الاساسية

- طيب

- وبعديها بتعطينا دعم مش هيك

- اها ... وبعدين معاك

- ولا قبلين يا سيدي بكل بساطة الحكومات العربية والدولية بتتعامل معنا زي الولد الصغير اللي باب البيت بسكر على ايدو

- اخخخخخخخ

- شووووو توجعت ؟؟؟؟

- والله شي بقشعر البدن ... طيب كمل

- اها ... شو بتعمل امو ؟؟؟ هااااا ... بتبوس الواو علشان يصير بح ... صح ؟؟؟

والولد مسكين مع وجعوا بصدق انو بوسة الماما بتشفي الوجع وبصير يتشغنف وشوية شوية بنسى الوجع

احنا هيك يا ابو جمعة لازم نبوس الواو .... فهمت يا كبير ... علي الصوت وعيد الاغنية خلينا نطرب

- بتعرف يا بو السعيد

- خير يا سيدي

- بوس الواو يا سيدي

12-11-2006

المزيد...

مذكرات ابو جمعة الحلقة - كيدهن عظيم (11)

اليوم وانا بالسوق شفت صديق النا اسمو سالم والله سالم هذا كان شرس . وما بسكت لحد ولما تزوج الاخ جنن مرتو . اليوم بس شفتو معاها شكلو هيك ما عجبني مش هذا سالم اللي رافع راية الرجل اولا

لما شفت ابو سعيد سألتو :

- ابو السعيد احزر مين شفت اليوم بالسوق ؟

- مين

- ولك شفت صاحبك سالم الوحش

- سالم ... زمان عنو

- بس شكلو لبدان وهديان كتير شو قصتو

- انت مش عارف

- لا والله شو صار احكي

- يا سيدي هذا سالم قرر يتزوج على مرتو ويعلمها الادب

- اها فشكلها مرتو الجديدة قوية ... مش مثل القديمة هبلة وعلى نياتها ... علشان هيك عرف قيمة مرتو القديمة وبعاملها كويس

- والله كلامك كلو غلط

- كيف يعني

- يعيني يا سيدي هو تزوج المرة الجديدة من هون ... ومرتو قلبت للوجه التاني وبلشت الحرب ضد الارهاب ... اول شي بدأت بحرب دبلوماسية ... جمعت ضدو الحلفاء من اقاربه. كل اخوتو واولاد عمو وقرايبو وطبعا ولادو كلهم اخدو موفق معادي للزواج وفي منهم ناس اعلنت شجبها ورفضها للموضوع.

- يا لهوي عليهم النسوان

- لسا ما شفت شي ... هلأ صار دور المقاطعة بلشت المقاطعة ضد هالزلمة من قبل كل الجهات و الدول المحيطة ... حتى ابوه قلو لا انت ابني ولا بعرفك اذا بتدخل مع مرتك الجديدة على بيتي ... وصارت المقاطعة وتضيق الحصار

بس اخوك سالم قاوم كتير ضد الطغيان النسائي ... ولاجل حقه في الزواج من زوجة ثانية

لكن للاسف التيار كان اقوى منو ... دخلت كل الاطراف في المعركة ضده ... وسقطت العاصمة

عارف المرحلة الاخيرة من المعركة كانت قاسية عليه الكل قاطعو وبدأو معو حوارات وموافضات عشان يطلق مرتو الجديدة ... لدرجة انو ابوه عرض عليه يدفع المتأخر من جيبتو واخوه عرض يدفع النفقة ... وهيك لحتى استسلم وطلقها

- هاي زي حرب العراق

- يا زلمة من يومها ما قمت الو قائمة ... عرف ان الله حق

- صحيح ان كيدهن لعظيم

احنا مش قدهم يا رجال

11-02-2006,

المزيد...

مذكرات ابو جمعة الحلقة - العيديات (10)

ايام العيد هاي كان على عكس المتوقع انسم بدني … والله انحرق دمي … يعني مسكت دمعتي … هذا اخر يوم رمضان قلت خليني اسحب فلوس كفاية تكفيني لاخر العيد بلاش ننقطع لانو الصرفات هاي احيانا بتكون سمة بدن … فسحبت مبلغ حوالي 400 دينار كل حيلتي للعيد … و بعد بشوية وانا بدخل المحل بدي اشتري شكولاتة … افقد الفلوس ما في فلوس … نبشت الدنيا متت ما في … بالاخير فقدت الامل وروحت لام جمعة … فبقولها شو اللي صار…

-شووووووووو 400 دينار ... والله لو انها فلوس حرام … ليش هيك يا ربي

مسكينة صارت تلطم وتبكي والله ققطعت قلبي ... وانا من جواة محروق من قلبي

-الله بعين يا ام جمعة خلص مهو في منهم 100 ليرة من اللي عيدونا ايهم الشغل ... هذول لا على البال ولا على الخاطر قلت بنطلع فيهم على مطعم انا وانتي والاولاد ... بس خلص اللي صار صار ... وهي اخذت مبلغ من ابو السعيد يقضيني للعيد ... وربنا بفرجها

-يعني اذا انسرقوا ربنا يكسر ايدي و رجليه ... ان شاء الله بيدفعهم دوا عليه وعلى ولادوا ... ئادر يا كريم

-يا مرا روقي خلص ... وحرام شو دخل ولادوا

-يعني مش حرم ولادي من انهم ينبسطو ... والله الهم من سنة بستنوا هالطلعة وبدهم يطلعو على مطعم وياكلوا بالشوكة والسكينة ... وبدهم يروحوا على الملاهي ... الله لا يسامحوا

والله انا مني علي ضغطي ارتفع ومش قادر ... قضيت ايام العيد بالعافية وانا مقهور ... اخر يوم العيد ما لقيت غير ام جمعة بتمد علي فلوس.

-شو هذول يا ام جمعة  

-هدول عيدياتي خدهم وخلينا نطلع مع الاولاد والله ما بحرمهم هالطلعة

-حدا الله ما بيني وبين فلوسك

-هو انا شو و انت شو ... ما احنا واحد ربنا ما يرحمنا منك

-الله يسعدك يا ام جمعة ... بس والله ما باخد قرش من فلوسك ... وهي حلفت ... ان شاء الله العيد الجاي او بعدين على الصيف بفرجها الله ... الموضوع هذا لا تحكي فيه

انا من داخلي ببكي مع اني كشرت في وجها علشان تخاف ... بس والله بداخلي مقهور ... الا جمعة ناطط

-بابا يلا نطلع مش انت وعدتنا

-بس انت عارف يا جمعة شو صار

-بابا خد ... انا عازمك

-شو هدول الفلوس

-هدول عيدياتي انا وافنان حوشناهم وما صرفنا ولا شي علشان نعزمكم على العيد

-25 دينار ... هم هدول شو بكفوا

-بنروح بنشتري فيهم اكل وبناكل بالحديقة ... يعني انت ما الك فيهم احنا عازمينك ... يلا حضر حالك

انا لما شفت عيون جمعة وافنان ما قدرت امسك حالي اكتر من هيك ... حضنتهم وبكيت ... الله يخليلي اولادي ومرتي ... كان نفسي ابسطهم بهاليوم

10-28-2006

المزيد...