اليوم رحت عند ابو السعيد قلت بنقعدلنا ساعة زمن عندو الي فترة مش شايفو ... الو وحشة الازعر
والله لما دخلت الحارة لقيت ابو السعيد قاعد عند ابو خليل الدكنجي ... قلت يلا بنقعد و بنطق حنك هناك احسن
والله وبلشنا نقاشاتنا البزنطية بالسياسة والامور الاجتماعية كعادتنا ... الا هالشب مثل الوردة داخل على الدكان و بدو يشتري ... قطعلنا حديثنا
الشب باشر لابو خليل وهو فاهم عليه ... شكلو الشب اخرس مسكين
- سكر ؟ كم كيلو ؟ ... خمسة ... طيب ولا يهمك
هي 5 كيلو ... سلم على ابوك
- له له له يا ابو خليل والله مسكين هالشب ... زي الوردة والله ... ومبين عليه ذكي وشاطر
- اه والله يا ابو جمعة فهمان الشب مخو بالف واحد وماسك محل ابوه ... هو اللي بيجب بضاعة ومرتب كل المحل ... باقي اخوتو همل بعيد عنك
- ما شاء الله ... ومين ابوه
- ابو سامر صاحب محلات الوفاء
- اها عرفتو والله ما شاء الله عليه ... يعني ابوه وضعو ممتاز ليه ما فكر يجرب يعملو سماعات او شي من هالقبيل
- مين قال ما فكر
- و ما زبطت معو شكلها
- على العكس صار يسمع زي الليرة الذهب 
- وليش شالهم 
الا ابو السعيد كالعادة نط
- يا ابو جمعة الزلمة ركبهم حوالي 6 شهور ... ضلو كل يوم يسمع اخبار على الجزيرة والعربية ... وبعدين قرر يشيلهم ... قال هيك احسنلو
- مسكين الشب شكلو صابتو صدمة عاطفية من اخبار الامة فقرر ينطرش احسنلو 
-لا يا عمي مش هيك ... بقلك انو قرر يصير مسؤول حكومي كبير او نائب في البرلمان
- طيب 
- قال الطرش ميزة مهمة للمسؤول او النائب ... وهاي ميزة اضافية الو ... فهمت يا ابو جمعة 
الله لا يحفظ سمعنا اجمعين
10-21-2006