الي فترة ما عم شارك واتفاعل مع الشارع كتير، أولا مشغول وتانيا صايبني حالة كسل واحباط من الطرفين الحكومة الفاضلة والمعارضة الرفيقة.
و أنا بقلب صفحات النت مش عارف فين شفت خبر اعتقال علاء الفزاع والتحقيق معه في محكمة أمن الدولة. صراحة انا قاعد مع علاء الفزاع اكتر من مرة، ومع اني غير متوافق مع حركة جايين واليسار الاجتماعي، بس الحركة على المستوى الوطني اشتغلت كتير وعملت شغل على الارض جميل.
المهم انا لما شفت محكمة امن الدولة انصدمت، هاي المحكمة لقضايا الفساد الكبيرة كتير اللي بتضرب مصالح البلد متل البورصة وغيرها. او القضايا اللي الها بالارهاب متل قضايا القاعدة.
طبعا مهما دورتها براسي مستحيل تركب معي انو الفزاع من الفاسدين الكبار يعني الزلمة متلنا طفران وكحيان. لا بشرب سيجار ولا عمري شفتو راكب سيارة فخمة ولا سمعت انو بسهر بفنادق. يعني فساد ما ركبت معي.
طيب الزلمة يسار اجتماعي يعني كمان بتركبش معي انو قاعدة وتفجريات. بصراحة ضليت اتحرقص لما نزل الخبر اليقين انو علاء فزاع طلع قاعدة وبدو يفجر الدستور الأردني.
وأخيرا اكتشفتك على حقيقتك يا علاء ... انت علاء بن لادن ... هدفك تدمير الدستور الاردني ... عم بتخطط لعملية ارهابية بدك تفجر فيها مقر الدستور الأردني. خلص انكشفت على حقيقتك
الصراحة انا بعد ما اكتشفت حقيقة علاء بن لادن. صرت افكر مهو في حركات في الاردن بتحكي بتغيير الدستور،اسف قصدي بتفجير الدستور. من هاي الحركات الارهابية، حركة 36 وحركة دستور 52 وطبعا في غيرهم كتير، احزاب وشخصيات عامة، كلهم طلعو منضمين للقاعدة وابن لادن.
بس بما انهم اعتقلو علاء يبقى اكيد هو زعيمهم الروحي الكبير ... علاء بن لادن ... مش هيك ولا انا غلطان؟
المهم رنيت على صديقي،سابقا بما انو طلع قاعدة، باسل الحمد من حركة دستور 52 وهاجمتو بشراسة. يا ارهابيين بدكم تفجروا الدستور الاردني. مش حرام عليكم؟
بالليل لقيت باسل منزل فيديو تسجيلي ... لابس عمامة وقاعد متربع على سجادة مزركشة من الصوف. وكاتبين تحت في اخر الشاشة باسل الظواهري يهدد بتفجير الدستور الاردني ما لم يتم الافراج عن علاء بن لادن.
وهدد باسل الظواهري بأنهم قادرين على اختراق الدستور مهما شددو عليه الحراسة. وان الدستور لن يهنأ بحياة سعيدة طول ما هو علاء بن لادن معتقل.
الصراحة انصدمت من باسل وعلاء وانصدمت من الحركات الوطنية كيف بتفكر بتغيير الدستور. حرام عليكم يا شباب ما بصير هيك. هذا الدستور تاع بلدنا لو تغيير كيف بدنا نعيش؟
جاوبوني ... كيف بدنا نعيش بدستور بتغيير؟ الله يسامحكم بس
وكعادتي أؤكد طبعا، ليس ذما في الوطن ولا ذما في المواطن، ولكن لاني بحبك يا وطن رح بحكي اللي في قلبي.
وكعادتي أؤكد طبعا، ليس ذما في الوطن ولا ذما في المواطن، ولكن لاني بحبك يا وطن رح بحكي اللي في قلبي.