قبل كم يوم كنت نازل على وسط البلد يوم الجمعة، أتخمخم، ترا انا بحب الخمخمة في وسط البلد. خاصة يوم الجمعة. البسطات هناك حلوة. وكل جمعة إلى ما أفقعلي طوشة مع ام جمعة.
- ليش جايب هاي الزبايل شو بدنا فيهم ؟؟؟
- شو زبايل هاي حقها ليرة ... شوفي.
- الله يحرمك اياها نزلة البلد الخمخمة تاعتك.
وشكلو الله سمع منها ... يا ريتك يا ام جمعة خبيرة في الدعاوي على اليهود متل ما هو علي.
والله ونزلت قبل كم يوم على البلد. قلت بصلي في المسجد الحسيني وبطلع بلف شوية على البسطات. لقيت ناس كتير هناك استغربت. قلت الله هاديهم ما شاء الله عليهم.
والله وخلصت الصلاة من هان وما سمعتلك غير واحد بقول بصوت عالي: تكبيييييييير ... والناس من وراه بتقول الله اكبر.
أقولكم الصراحة انا مش فاهم شو في ... والصراحة استحيت أسأل ليضحكو علي. قلت يمكن اعتصام لفلسطين ولا شي من هالحكي وعيب علي ما اعرف خليني ماشي معهم شوية وبعدين بفرجها الله.
تطلعت كانوا شي 500 واحد قلت فلسطين ضاعت كمان مرة. بس 500 ولكم على طابور الخبز يوم الثلجة بتكونو أكثر. بعدين تذكرت اني جاي بالصدفة استحيت من حالي.
شو بدكم في طولة السيرة ركاض على الصف الأول من المظاهرة وبدي ابلش هتافات.ومحسوبكم هتيف من الطراز الرفيع. أيام المدرسة كنا نطلع اعتصامات لفلسطين وكنت مبدع. مهو بصراحة حجة بحاجة يعني علشان ما نكمل دوام الدراسة. وأيام الفطبول كنت هتيف مبارايات معروف.
المهم، لما وصلت اول الطابور الا هي كل الشعارات عن الاصلاح. قلت أبوك يالاصلاح ... شو اصلاح ما اصلاح ... خليني اهرب احسنلي.
وحملت حالي وبدي اتركهم الا هو صف درك من اللي بحبهم قلبكم. اقصر واحد فيهم ركبتو بتوصل نص صدري.
اكون صريح معكم كنت كتير مزنوق ... وماسك حالي على الشحطة.
تطلعت بصف الدرك من قدامي وصف المعتظاهرين من وراي لقيت حالي بالنص متل السندويشة. المعتصمين بحكو حرية وسلمية وما بعرف شو ... والدرك ماسك القناوي وبدق على الترس ... صوتهم بخوف.
طبعا بين حانا ومانا ضيعنا لحانا ... ما لقيت غير الدرك هاجم ... وانا مش عارف انفد ... تطلعت شفت واحد ضخم بقولي بدك تعتصم يا كلب؟
كلب ... كلب مو مهم بس ما تضرب ... قال اني شجاع يعني.
بصراحة انا بعديها مش متذكر شو صار ... صحيت لقيت حالي في المستشفى وراسي ملفوف. ووووو ... بالله عليكم ما تفهموني غلط ... بس لاني كنت مزنوق مش أكثر ... شكلي لما اغمى علي فلتت.
بس الحلو لما تطلعت جنبي لقيت الدركي اللي قلي يا كلب في السرير الجنبي ... مطبوش ... قلت بحالي شكلي لما بعصب بعرفش شو ممكن أعمل ... خليه مش قلي كلب ... يعرف انا شو بقدر أعمل.
مش قليل أنا بعجبكم ... بس مش دايما بعملها على حالي