دايما بحكولي ما بنعرف شو أفكارك بالزبط ... وبعتبروا هذا اتهام ... يعني من باب انو كلهم عندهم أفكار ثابتة، او هيك بعتقدوا. بالغالب بشوف حالي اوضح منهم كلهم، على الاقل مبادئي خاصة فيي أنا ما حد بقررلي شو احكي ولا بحكملي أفكاري.
طبعا منظومة حقوق الانسان هي الاخلاقيات الاساسية اللي بنطلق منها في اي قرار بحياتي وبعد هيك بترك الموضوع لحريتي الخاصة. هذا الفرق بيني وبين كتير ناس من اللي حولي اللي ما بقدر يحكي رأيو لأنو بخاف من الشيخ أو من كلام الناس او من الحزب او الحكومة.
ما بعني هذا إني ما بخاف بس أنا حر وما بهمني يفهمني هدول الناس أو يأمنو بأفكاري. ما بهمني أبدا شو بأمن اللي قبالي بما أنو ما عم يأذيني ويضرني.
بعتقد أنو الليبرالية شي جوانا بنعيشو احنا بدون تدخلات الآخرين وانو صعب انك تشرح هالشي للناس. الناس لوحدها رح توصل لهذا الاعتقاد مع تجاربها الخاصة. علشان هيك لما يسألوني نفسي أفهم شو مبادئك ما بجاوب.
بس الي فترة هيك عم غير منهجي او ايديولوجيتي في التعامل مع الامور، وهالشي نابع من ليبراليتي، اللي بتعلمني اني لازم ابقى اتغيير واصحح نفسي كل فترة.
المهم أنا عم غير اسلوبي على النت. يعني ما بهمني كتير أفتح المواضيع الشائعة في الشارع او حتى اناقشها. انا هون لاحكي عن اللي مسكوت عنو وعن اللي لازم نحكي عنو.
بعد كل هالمقدمة هاي حابب احكي عن الليبرالية وشو يعني أنا ليبرالي؟
لما أكون ليبرالي حقيقي هذا بعني انو اخلاقياتي الاساسية نابعة من اساس انسانية خالصة بتامن بالحريات المسؤولة وبتأمن بالملكية الفردية وحقي بالامتلاك بما لا يتجاوز الاخلاقيات الاساسية التي انتمي اليها، اقصد الانسانية.
لما بكون ليبرالي ما بعني ابدا اني اكون رأسمالي وهناك فرق كبير بين الليبرالية والرأسمالية. فالرأسمالي يتخلى عن الاخلاقيات ليؤمن بالامتلاك على حساب الاخرين. أما الليبرالي الحقيقي غير نفعي او ليس براغماتيا بشكل نفعي. بحيث يجعل من حقه في الملكية أعلى من كل القيم كما هو الرأسمالي.
لما بكون ليبرالي بأمن بالفرد قبل كل شي وبعرف أنو الفرد هو الاساس اللي ممكن نعتمد عليه في بناء مجتمع أقوى واكثر تمساك. ولا يعتقد الليبرالي بأن الشعوب بحاجة لوصاية ايا كانت. بقصد لا وصاية إلاهية ولا وصاية حزبية ولا وصاية سياسية.
لما بكون ليبرالي بتشدد مع الافكار وما بسامحها أبدا وبنتقدها بشدة أو بوقف معها بشدة لما بأمن فيها. ولكن في المقابل بتساهل مع الافراد وما بقدر اني اقبل فكرة اضطهاد انسان آخر، حتى اوقات لو اضطهدني .
لما بكون ليبرالي بتغيير وبراجع نفسي كل فترة لانو ما في شي ثابت الا الاخلاق. أما منهجي في الحياة فمتغير حسب ظروفي وواقعي.
هي الليبرالية الحقيقية ... وهي اللي معظم الناس مو فاهمينو صح سواء عن حسن نية او سوء نية .
على كل الاحوال انا حبيت احكي عن الليبرالية قد ما قرفتوني وانتو تسألوني ... وسلامتكم